sabaykhmer24h: ខេមរៈ សិរីមន្ត គ្រោងធ្វើសន្និសីទកាសែតជាថ្មី ខណៈមិនមាន ដំណោះស្រាយ ប៉ុន្តែត្រូវពន្យារពេល

ភ្នំពេញ:
អស់រយៈពេល៣ខែហើយដែលការផ្តល់សំណងដល់ជនរងគ្រោះ ក្នុងក្រុមតារាចម្រៀង ខេមរៈ សិរីមន្ត មិនទាន់ត្រូវបានដោះស្រាយនៅឡើយ។ ការពន្យាពេលយ៉ាងយូនេះ នាំឲ្យក្រុមគ្រួសារជនរងគ្រោះ គ្រោងនឹងធ្វើសន្និសីទសារព័ត៌មានជាថ្មី ប្រយោជន៍ជំរុញ និងទាមទាឲ្យមានការពន្លឿននីតិវិធី ប៉ុន្តែគម្រោងសន្និសីទនេះ ត្រូវបានពន្យាពេល។

បើតាមការគ្រោងទុក លោក ខេមរៈ សិរីមន្ត និងក្រុមគ្រួសារជនរងគ្រោះ គ្រោងនឹងធ្វើកម្មវិធីសន្និសីទសារព័ត៌មាន នៅព្រឹកថ្ងៃច័ន្ទទី១០ខែមិថុនាឆ្នាំ២០១៣នេះ ប៉ុន្តែគម្រោងនេះត្រូវបាពន្យាពេល។
បងប្រុសរបស់តារាចម្រៀង ខេមរៈ សិរីមន្ត គឺលោក ខេមរៈ ភិរុណ បានប្រាប់ពីម្សិលមិញថា គម្រោងនេះត្រូវបានពន្យាពេល ដោយសារលោក និងក្រុមគ្រួសារយល់ឃើញថា មិនទាន់ដល់ពេលដែលត្រូវធ្វើនៅឡើយ។ លោកបានបញ្ជាក់ថា “ពូកុយ និងអ្នកមីង
ណាង គាត់ក៏ចង់ឲ្យពន្យាពេលធ្វើដែរ ព្រោះយើងដូចជាទើបតែនឹងធ្វើដែរ ហើយខាងមេធាវី ក៏សំណូមពរដូចនេះដែរ”។ ទោះជាយ៉ាងណា លោកបានបញ្ជាក់ថា គម្រោងសន្និសីទនេះ ធ្វើឡើងដើម្បីជំរុញឲ្យមានការដោះស្រាយបញ្ហាសំណងដល់អ្នករងគ្រោះ និងក្រុមគ្រួសារជនរងគ្រោះឲ្យបានលឿន ហើយលោកក៏ទុកបញ្ហាខាងលើឲ្យសមត្ថកិច្ចពាក់ព័ន្ធ ធ្វើការដោះស្រាយដដែល។
ទោះជាយ៉ាងណា ក៏មានការលេចធ្លាយដែរថា មានបញ្ហាមិនប្រក្រតីមួយចំនួនដែលកើតមានឡើង ក្នុងអំឡុងដំណើរការប្រព្រឹត្តិទៅនៃការស៊ើបអង្កេតលើករណីនេះ ពិសេសបញ្ហាភ្លើងឡាស៊ែរ ដែលត្រូវបានគេសង្ស័យថា មានប្រើក្នុងរថយន្តគ្រោះថ្នាក់ ហើយភ្លើងឡាស៊ែរនេះ ត្រូវបានគេសង្ស័យថា ជាការប្រឌិតឡើងប្រយោជន៍អូសបន្លាយពេលវេលា និងបន្ធូរបន្ថយលើប្រាក់សំណងជូនតារាចម្រៀង ខេមរៈ សិរីមន្ត និងគ្រួសារជនរងគ្រោះ។
លោកខេមរៈ ភិរុណ ទទួលស្គាល់ថា ប្រធានបទភ្លើងឡាស៊ែនេះ ពិតជានឹងមានក្នុងគម្រោងសន្និសីទកាសែតនោះមែន ប៉ុន្តែវាគឺជាចំណុចមួយប៉ុណ្ណោះ នៅមានបញ្ហាមិនប្រក្រតីផ្សេងទៀត ដែលគ្រោងលើកមកនិយាយ ប៉ុន្តែលោកមិនបានបញ្ជាក់អំពីបញ្ហាទាំងអស់នោះទេ។ លោកនៅមិនទាន់ប្រាកដនៅឡើយទេថា តើកម្មវិធីសន្និសីទសារព័ត៌មាននេះ នឹងត្រូវចាប់ផ្តើមនៅពេលណាពិតប្រាកដនៅឡើយ។
ប្រភពធ្លាយចេញពីខេត្តព្រះសីហនុ បានបញ្ជាក់ថា ទាំងចាងហ្វាងផលិតកម្ម សាន់ដេរ លោកខេមរៈ សិរីមន្ត និងក្រុមគ្រួសារជនរងគ្រោះ ចង់ឲ្យតុលាការខេត្តព្រះសីហនុ ពន្លឿនការកាត់ក្តី ហើយសុំណុំរឿងនេះ អាចឡើងទៅដល់សាលាឧទ្ធរណ៍ ដែលខាងភាគីជនរងគ្រោះ ចង់ឲ្យសំណុំរឿងនេះ ត្រូវបានយកមកដោះស្រាយនៅរាជធានីភ្នំពេញវិញ ព្រោះតែត្រូវចំណាយពេលវេលាយូរនៅខេត្តព្រះសីហនុ និងត្រូវចំណាយថវិកាច្រើនក្នុងការធ្វើដំណើរនោះ។
យោងតាមពាក្យបណ្តឹង គ្រាន់តែតារាចម្រៀង ខេមរៈ សិរីមន្តម្នាក់ ទាមទាសំណងប្រមាណជាង៩ម៉ឺនដុល្លារអាមេរិក ទាំងការខូចខាតរថយន្ត ការលុបចោលកិច្ចសន្យា និងប៉ះពាល់ផ្នែកផ្លូវចិត្តជាដើម។ រីឯភាគីគ្រួសារជនរងគ្រោះ ដែលបាត់បង់ជីវិតវិញ ទាមទាសំណងប្រមាណ ២,៥ម៉ឺនដុល្លារអាមេរិក។ សរុបមិនក្រោម ២០ម៉ឺនដុល្លារអាមេរិកឡើយ ហើយគេនៅមិនទាន់ដឹងទេថា ក្រុមហ៊ុន SK ដែលបង្កហេតុមានលទ្ធភាព ឬផ្តល់សំណងទៅតាមការទាមទារនៅឡើយទេ។
គួររំលឹកថា កាលពីថ្ងៃទី៧ ខែមីនា ឆ្នាំ២០១៣ វេលាម៉ោង៨ និង៥០នាទីយប់ មានករណីគ្រោះថ្នាក់ចរាចរកើត ឡើងបង្កដោយរថយន្ដម៉ាកហ៊ីណូប្រភេទ កុងតឺន័រ ពាក់ស្លាកលេខភ្នំពេញ 3A-9723 ដែលធ្វើដំណើរពីខេត្ដព្រះសីហនុ មកភ្នំពេញ បានបុកជាមួយរថយន្ដម៉ាក តូយូតាធុនដ្រា ពណ៌ស ពាក់ស្លាកលេខ ភ្នំពេញ 2N-7997 ។ រថយន្ដនេះបានដឹក ក្រុមសិល្បៈតារាចម្រៀងរបស់លោក ខេមរៈ សិរីមន្ដ ដើម្បីទៅសម្ដែងអបអរសាទរថ្ងៃ៨មីនា ដែលជាថ្ងៃសិទ្ធិនារី ។
អ្នកស្លាប់ត្រូវបានគេស្គាល់ឈ្មោះ ទី១. រី បុផារ៉ា ភេទប្រុស អាយុ២៥ឆ្នាំ ជាយោធា វរៈ៩១ ទ័ពអាកាស មានទីលំនៅភូមិព្រៃ ទា សង្កាត់ចោមចៅ ខណ្ឌពោធិ៍សែនជ័យ ជាអ្នកបើកបរ, ទី២.ឈ្មោះ សោម វណ្ណា រិទ្ធ ភេទប្រុស អាយុ៣២ឆ្នាំ មានមុខរបរ ជាអ្នករាំកំដឆាក រស់នៅសង្កាត់ស្រះ ចក ខណ្ឌដូនពេញ, ទី៣.ឈ្មោះអ៊ាច វណ្ណៈ ភេទប្រុស រស់នៅសង្កាត់ទួលទំពូង ខណ្ឌ ចំការមន ជាកូនលោកយាយ ណយ សំណាង និងទី៤.ឈ្មោះ ជី វីរៈ ភេទប្រុស អាយុ ១៩ឆ្នាំ សិល្បករជាកូនបង្កើតតារាកំប្លែង ជួង ជី ហៅនាយកុយ ។ រីឯអ្នករងរបួសបន្ដិចបន្ដួច ដែលជិះរថយន្ដជាមួយខេមរៈ សិរីមន្ដ ទី១.ឈ្មោះ គួយ ផល្លី ភេទស្រី អាយុ២៦ ឆ្នាំ, ទី២.ឈ្មោះ គួយ ស្នេហ៍ ភេទស្រី អាយុ១ឆ្នាំ ទី៣.ឈ្មោះ រី ភឿន អាយុ២០ ឆ្នាំ និងតារាចម្រៀងខេមរៈ សិរីមន្ដ ៕