ព្រះវិហារវត្តធនមន្តមានក្បូរក្បាច់ និងការលាបពណ៌គួរឲ្យទាក់ទាញ។ រូបថត ឈឹម ស្រីនាង
ភ្នំពេញ : ទូកបាតរាបលាបពណ៌សឆ្នូតខៀវដំបូលប្រក់ស្លឹក ស្រោបដោយប្លាស្ទិក១គ្រឿងកំពុងរេរាំតាមរលកក្បែរមាត់ទឹករង់ចាំដឹក អ្នកដំណើរទៅគយគន់ទេសភាពសំណង់ប្រវត្តិសាស្ត្រ និងស្វែងយល់ពីវប្បធម៌រស់នៅរបស់ប្រជាជនតាមដងទន្លេមេគង្គ។
នាវាទេសចណ៍ដែលមានរាងប្លែកខុសពីទូកអ្នកស្រុកធម្មតាទើបតែមាន វត្តមាននៅប្រទេសកម្ពុជាកាលពីចុងឆ្នាំ២០១២ទេ។ ទូកលំដាប់ថ្នាក់អន្តរជាតិនេះមានឈ្មោះថាLes Rives Authentic River experience ដែរអាចផ្ទុកភ្ញៀវបាន១៥នាក់។
រំពេចនោះភ្ញៀវទេសចរក៏ត្រូវបានផ្ដល់នូវកន្សែងត្រជាក់ការបម្រើ នូវកាហ្វេក្តៅៗនិងអាហារពេលព្រឹកផងដែរ។ការញុំាអាហារបណ្តើរ គយគន់ទេសភាពតាមដងទន្លេនាពេលព្រឹកព្រលឹមពិតជាត្រជាក់ភ្នែក ប្លែកអារម្មណ៍មែន។ ប្រមាណជា២០នាទីក្រោយ ទូកក៏បានបរទៅដល់កន្លែងដែលផ្ដុំដោយផ្ទះអ្នកនេសាទត្រៀបត្រា។
អំឡុងពេលសំចត១៥នាទីភ្ញៀវត្រូវបានអញ្ជើញឲ្យចុះទស្សនាការ ចិញ្ចឹមត្រីនិងស្វែងយល់ពីជីវភាពរស់នៅរបស់ប្រជាជនមុននឹងបន្ត ដំណើរទៅទស្សនាវត្តបុរាណឈ្មោះធនមន្ត។ កំពុងតែធ្វើដំណើរមិនយូរប៉ុន្មាន ស្រាប់តែទូកត្រូវបានហ៊ុមព័ទ្ធដោយដើមកំប្លោកពណ៌បៃតងខ្ចីដែលដុះ ពាសពេញផ្ទៃទន្លេ ធ្វើឲ្យអ្នកបើកនាវាត្រូវឈប់ដើម្បីបោចកំប្លោកចេញពីស្លាបចក្រ។
ដោយសារតែអាកាសធាតុរាងក្ដៅបន្តិច ទើបពេលទូកជិតដល់ចំណតចូលវត្ត ក្រុមមគ្គុទេសក៍បានជូនទឹកពិសា និងឆត្រទៅឲ្យភ្ញៀវម្នាក់មួយ។ មុននឹងទៅដល់វត្ត។ពេលធ្វើដំណើរថ្មើរជើងប្រមាណជា៥នាទីយើងនឹង ប្រទះ ឃើញផ្ទះឈើបុរាណសង់តាមក្បូរក្បាច់របស់ចិនក្នុងឆ្នាំ១៩៤៥ដែលមាន សសរមូលធំៗតំណាងពីភាពស្ដុកស្តម្ភរបស់ម្ចាស់គេហដ្ឋាន។ ភ្ញៀវទាំងឡាយបានឈប់សម្រាកកាយ និងសម្រួលឥរិយាបថបន្តិច មុននឹងឡើងរ៉ឺម៉កម៉ូតូបន្តទៅទស្សនាទេសភាពចម្ការបន្លែ និងបឹងឈូកដ៏ស្រស់ស្អាតផងដែរ។មិនយូរប៉ុន្មាន រ៉ឺម៉កម៉ូតូក៏បាននាំភ្ញៀវទាំងអស់គ្នាទៅដល់វត្ត។ស្ថាបនានៅលើ ភ្នំវិហារវត្តធនមន្តហាក់មានសភាពខុសប្លែកពីអារាមពុទ្ធសាសនាដទៃ ទៀត ព្រោះតែក្បូរក្បាច់ និងពណ៌របស់វាត្រូវបានរចនាដោយគ្រួសាររាជវង្សក្នុងឆ្នាំ១៩៥៤។ នៅក្នុងព្រះវិហារ មានពុទ្ធគំនូរ រូបភាពអំពីផលកម្ម និងប្រវត្តិនាងបដាចា។
ត្រឡប់មកកាន់ទូកវិញ នឹងត្រូវបានស្វាគមន៍ដោយកន្សែងត្រជាក់ជូតមុខឲ្យស្រស់ស្រាយ មុននឹងស្រស់ស្រូបអាហារថ្ងៃត្រង់ ត្រៀមខ្លួនទៅកោះអន្លង់ចិនដើម្បីទស្សនាការដាំដំណាំគូឆាយ ខ្នុរ មៀន ត្របែក និងស្វាយ។
ដំណើរកម្សាន្តរយៈពេល៧ម៉ោងមានតម្លៃ១២០ដុល្លារដោយគិតទាំងការបម្រើអាហារ ភេសជ្ជៈ និងដឹកជញ្ជូន។
លោកសេមហ្វូស៊ីងនាយករងក្រុមហ៊ុន LesRivesAuthenticRiverexperience បានឲ្យដឹងថា៖«ដំណើរកម្សាន្តតាមទូកលក្ខណៈស្តង់ដារមួយនេះគឺចង់ ផ្តោតទៅលើទាំងភ្ញៀវជាតិនិងអន្តរជាតិដែលចង់យល់ដឹងពីការរស់នៅ និងវប្បធម៌ប្រពៃណីរបស់ប្រជាជនតាមដងទន្លេ»។
ព័ត៌មានបន្ថែមពីដំណើរកម្សាន្តតាមនាវាតាមដងទន្លេមេគង្គនេះ មាននៅគេហទំព័រ www.lesrivesexperience.com ឬទំនាក់ទំនងតាមទូរស័ព្ទលេខ០១៧២២២ ៧១៥៕
No comments:
Post a Comment