sabaykhmer24h: មនុស្សរាប់ពាន់នាក់ ត្រូវបានសម្លាប់ដោយទឹកជំនន់នៅភាគខាងជើងឥណ្ឌា

ឥណ្ឌា៖ ទឹកជំនន់ និងបាក់ដី បានសម្លាប់មនុស្សយ៉ាងតិច ១ ពាន់នាក់ និងបាត់ខ្លួន ១ម៉ឺននាក់ នៅភាគខាងជើង នៃប្រទេសឥណ្ឌា ដែលគ្រោះធម្មជាតិដ៏អាក្រក់នេះ បានបង្កឡើងដោយភ្លៀងធ្លាក់ដ៏ខ្លាំងក្លាបំផុត កាលពីសប្តាហ៍មុន ។ ចំនួនអ្នកស្លាប់ និងអ្នកបាត់ខ្លួន ត្រូវបានរំពឹងថា នឹងបន្តកើនឡើងទៀត ។

លោក Vijay Bahuguna អភិបាលរដ្ឋ Uttarakhand បានបញ្ជាក់ថា ចំនួនអ្នកស្លាប់ចុងក្រោយ នឹងដឹងច្បាស់ នៅពេលជួបប្រជុំជាមួយក្រុមអ្នកសារព័ត៌មាន ។ រីឯរដ្ឋមន្ត្រីក្រសួងមហាផ្ទៃឥណ្ឌា លោក

Shushil Kumar Shinde បានប្រាប់សារព័ត៌មានឥណ្ឌា កាលពីថ្ងៃសៅរ៍ ថា មានមនុស្ស ៤០,០០០ នាក់ នៅតែស្ថិតក្នុងស្ថានភាពតែលតោល ហើយគាត់បានពណ៌នាទៀតថា ទឹកជំនន់នេះ ជា “វិបត្តិជាតិ” ដ៏ធ្ងន់ធ្ងរមួយ ។

កិច្ចខិតខំជួយសង្គ្រោះ របស់ក្រុមសមាជិកកងទ័ពឥណ្ឌា បានជួបការលំបាកយ៉ាងខ្លាំង ព្រោះទីកន្លែងសង្គ្រោះ ស្ថិតនៅក្នុងជ្រលងភ្នំតូចចង្អៀត ដែលមានកម្ពស់ដល់ទៅ ១១,០០០ ហ្វីត កាលពីថ្ងៃអាទិត្យ ។ ទឹកទន្លេ, ព្រែក មួយចំនួន ដែលហូរឆ្លងកាត់រដ្ឋនេះ បានស្រកចុះ ប៉ុន្តែទឹកជំនន់បានបំផ្លាញ ផ្លូវថ្នល់, ស្ពាន, បង្គោលភ្លើងជាច្រើនកន្លែង និងបណ្តាញទូរគមនាគមន៍ ។

យោងតាម មន្ត្រីឥណ្ឌា បានឲ្យដឹងថា ឧទ្ធម្ភាគចក្រជាង ៤០ គ្រឿង ត្រូវបានប្រើប្រាស់ ដើម្បីសង្គ្រោះក្រុមអ្នកធម្មយាត្រា នៅតាមតំបន់ភ្នំដាច់ស្រយាល ប៉ុន្តែដីបានរារាំងដល់ការសង្គ្រោះរបស់ពួកគេ ។ ឧទ្ធម្ភាគចក្រសង្គ្រោះ១គ្រឿង បានជួបគ្រោះថ្នាក់ កាលពីថ្ងៃសុក្រ ខណៈព្យាយាមជម្លៀសក្រុមអ្នកធម្មយាត្រា ដែលបានជាប់គាំងនៅក្នុងភូមិមួយ ក្បែរទីក្រុង Kedarnath រដ្ឋ Uttarakhand បណ្តាលឲ្យអ្នកបើកបរឧម្ភាគចក្រម្នាក់ រងរបួស ហើយក៏ត្រូវបានបញ្ជូនទៅសង្គ្រោះបន្ទាន់ នៅឯមន្ទីរពេទ្យផងដែរ -នេះបើតាមមន្ត្រីប៉ូលីស បានប្រាប់ភ្ញាក់ងារសារព័ត៌មានឥណ្ឌា Press Trust ៕