អគារស្ទូឌីយោ ថតភាពយន្តដ៏ធំលំដាប់ថ្នាក់ជាតិ
និងអន្តរជាតិជាលើកដំបូងត្រូវបានបើក
សម្ពោធដាក់ឲ្យប្រើប្រាស់។
រូបថត សេត គឹមសឿន
មានសម្ភារនិងឧបករណ៍ច្រើនតាមតម្រូវការ ហើយវាក៏ជាចំណុចទាក់ទាញផលិតកម្មភាពយន្តបរទេសនោះ។
លោក ឃឹម សារិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈបានឲ្យដឹងថា ទាក់ទងនឹងការសាងសង់ស្ទូឌីយោថតភាពយន្តរបស់កម្ពុជានេះ ការសិក្សាគម្រោងប្លង់ និងស្ថាបត្យកម្មរួមទាំងគ្រោងប្លង់គ្រឿងបង្គុំត្រូវបានសិក្សាដោយ ស្ថាបត្យករដែលជាមន្ត្រីក្រសួងវប្បធម៌ និងវិចិត្រសិល្បៈរីឯការសាងសង់ក៏ស្ថិតក្រោមការត្រួតពិនិត្យយ៉ាង ហ្មត់ចត់ដោយមន្ត្រីបច្ចេកទេសរបស់ក្រសួងផងដែរ។
លោកបានមានប្រសាសន៍បន្តថា៖«ការសាង់សង់ស្ថាបត្យកម្មខាងក្រៅ ត្រូវបានបញ្ចូលសមាសភាពស្ថាបត្យកម្មជាតិតាមលំនាំរចនាប័ទ្មខ្មែររួម ជាមួយនឹងស្ថាបត្យកម្មសម័យទំនើប។ គម្រោងប្លង់ទាំងអស់សុទ្ធតែធ្វើឡើងតាមបទដ្ឋានបច្ចេកទេស ដែលធានាគុណភាព សុវត្ថិភាព និងសោភណភាព»។
ដោយឡែកចំពោះវិសាលភាពស្ទូឌីយោ វិញ លោកឃឹម សារិទ្ធ បានបញ្ជាក់ថា ផ្ទៃដីសម្រាប់កសាងស្ទូឌីយោថតខ្សែភាពយន្តនេះមានទំហំចំនួន៣៤ ៣៨១,៨១ម៉ែត្រការ៉េ ស្ថិតនៅក្នុងភូមិសំណង់ ឃុំរកាធំ ស្រុកច្បារមន ខេត្តកំពង់ស្ពឺ ។
គួរបញ្ជាក់ថា នៅចុងសម័យនឹមត្រួតត្រារបស់អាណានិគមនិយមបារាំងអ្នកផលិតភាពយន្ត ខ្មែរដំបូងបំផុតគឺព្រះកុរណាព្រះបាទនរោត្តម សីហនុ ពីឆ្នាំ១៨៤៥ ដល់១៩៤៦ ដែលកាលពីពេលនោះព្រះអង្គបានចាប់ផ្តើមថតភាពយន្តជាហ្វីលសខ្មៅ តែគ្មានសំឡេង។ ឆ្នាំ១៩៥៦ អាជ្ញាធរអាណានិគមនិយមបារាំងបានប្រគល់ក្រសួងព័ត៌មានឲ្យកម្ពុជា គ្រប់គ្រង ហើយក្នុងនោះ ក៏មានផ្នែកភាពយន្ត Service De Cinema រួមទាំងកិច្ចការត្រួតពិនិត្យភាពយន្ត ស្ថិតនៅផ្សារចាស់នៅមាត់ទន្លេ។ ក្រោយមកភាពយន្តខ្មែរក៏កាន់តែមានភាពរីកចម្រើន ហើយរោងភាពយន្តជាច្រើនត្រូវបានបង្កើតឡើងនៅភ្នំពេញ និងបន្តទៅតាមបណ្តាខេត្តនានា។
ជាមួយនឹងការផ្តល់ដំបូន្មានល្អដល់សិល្បករសិល្បការិនីទាំងអស់ ត្រូវខិតខំដុះខាត់ជំនាញរបស់ខ្លួននិងបង្កើតគំនិតតាក់តែងថ្មីប្រកប ដោយរូបារម្មណ៍សម្តែងនៅក្នុងភាពយន្តលោក សុខ អាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី ដែលជាអធិបតីភាពនៅក្នុងពិធីសម្ពោធដាក់ឲ្យប្រើប្រាស់ស្ទូឌីយោ ភាពយន្តកម្ពុជា បានមានប្រសាសន៍ថា៖«យើងបានចាប់ផ្តើមថតកុនតាំងពីសម័យព្រះករុណា សម្តេចតា ប៉ុន្តែកន្លែងថតកុនដែលល្អអ៊ីចឹងជាលើកទី១ហើយដែលយើងមានមាន ទីធ្លាប្រមាណជាង៣ហិកតា និងអគារដល់ទៅជាង៧០០០ម៉ែត្រការ៉េឯណ្ណោះ។ អ៊ីចឹងយើងអាចថតរឿងសម័យរឿងបុរាណ យុគសម័យកណ្តាលអីក៏បានដែរ នៅក្នុងស្ទូឌីយោនោះគេអាចតុបតែងបានទាំងអស់ និងមានថតជិះឡាន ជិះកប៉ាល់ហោះ ជិះរទេះភ្លើងនៅក្នុងស្ទីឌីយោ ហ្នឹងក៏បានដែរ។ អ៊ីចឹង ការកសាងស្ទីឌីយោនេះជាជំហានមួយដ៏សំខាន់នៅក្នុងការរីកចម្រើនឈាន ឡើងនិងការផលិតភាពយន្តខ្មែរ»។
លោកបានបន្តថា៖«ខ្ញុំគិតថា លោកប្រធានស្ទូឌីយោគួរតែមានការផ្សព្វផ្សាយឲ្យគេបានដឹង មិនតែក្នុងប្រទេសទេ នៅក្រៅប្រទេសក៏គួរតែធ្វើដែរ ព្រោះផលិតកម្មបរទេសក៏ត្រូវការកន្លែងថ្មីដែរ។ ខ្ញុំគិតថា ការបង្កើតស្ទូឌីយោនេះ គឺជាការទាក់ទាញការវិនិយោគភាពយន្តបរទេសធំៗមកស្រុកខ្មែរ ព្រោះពួកគាត់មិនចាំបាច់យកសម្ភារមកទេ ស្ទូឌីយោ យើងមានសម្ភារប្រើប្រាស់ច្រើនកម្រិតស្តង់ដារសម្រាប់ថតកុនល្អបាន»។ លោកបញ្ជាក់ថា៖«ក្រៅពីថតភាពយន្តធំៗ គេក៏ត្រូវការថតភាពយន្តខ្លីៗ ភាពយន្តឯកសារ និងការថតស្ប៉តខ្លីៗដែរ អ៊ីចឹងទាល់តែយើងផ្សព្វផ្សាយឲ្យគេស្គាល់សិន»៕
No comments:
Post a Comment